चालो गौरवभूमी( गहुली )*

*चालो गौरवभूमी( गहुली )*
===================
सारी गोर बंजारा भाई भेनेऊन
    जय सेवालाल !
    स्वातंत्र्यपूर्व आणि स्वातंत्र्य नंतर पांच साले लगु आपणे जातेपर गुन्हेगार जात करन डाग वेतोतो. ई डाग निकळेर ग्यारह सालेर बाद आपणे समाजेन ५ डिसेंबर १९६३  ये दन एक गौरव प्राप्त वियो. संतेर आणि परिवर्तनवादी राज्यरो मुख्यमंत्री वेयोरो सन्मान आपणे समाजेन वसंतराव नाईक साहेबेरे माध्यमेती मळो. डुंगर खोळाम रेयेवाळो , शिक्षण आणि सामाजिक दर्जा जे समाजेन कोनी र असे आपणे समाजेन राजसत्तारो प्रमुख पद मळणु ई  हमारे समाजेसारू स्वाभिमानेर आणि गौरवेर वात र .
     कोई मानो या मत मानो एक सत्य असो छ की वसंतराव  नाईक साहेबे कारणच आज आपणो समाज मान सन्मानेती जगरोच. उनुर कारणच आपणो समाजेन प्रतिष्ठा मळीच .
    आज आपणो समाज वेगवेगळे क्षेत्रेमा प्रगती कररोच . पण प्रसगतीरे नादेमा एक वात ऊ भुलरोच . जे हमारे दैवते कारण हाम आंग बढरेचा ओन कती तरी हाम भुलरेचा आसो चित्र आज समाजेमा देखेन मळरोच . जो महानायक हमेन अंधारे मांईती भार काढन वजाळेर वाट वतायो . समाजेन मान - सन्मान, प्रतिष्ठा मळान दिनो ओरो पूर्ण श्रद्धाती आदरभाव व्यक्त करेसारु एक नवीन संकल्प समाजे समोर मेलेमा आवरोच.
  ५ डिसेंबर १९६३ ये दन वसंतराव नाईक साहेब सत्ता ग्रहण किदो करन ई दन आपण ये सालेती नाईक साहेबेरी जन्म भूमीम जेन गौरवभूमी करन आपण नाम देरेचा . ये गौरवभूमी मा ( गहुली ) ५ डिसेंबर २०१७ मंगळवार ये दन *बंजारा समाज गौरव दिन* करन साजरो करेमा आवरोच.
   सारी गोरुन विनंती करेमा आवच की, वसंतराव  नाईक साहेबेन अभिवादन करेसारु आपण एक दन आपणो काम धंदो बाजून रखाडन पुण्य गौरवभूमी , गहुली, ता .पुसद जि. यवतमाळ आत न चुकता आणू आणि बंजारा समाज गौरव दिन सोहळा मा सामील वेणो ई हात जोडन विनंती छ.
               आपणच
बंजारा समाज गौरव दिन सोहळा
   आयोजन समिती